ශර්ලොක් හෝම්ස් : අතුරුදහන් වූ නෞකාව - සොෆී ඇන්ඩසන්

 අතුරුදන් වූ නෞකාව... 

     "සොෆී ඇන්ඩසන්" 

       °_දෙවන කොටස_°

ඇය මුහුණ දුන් ගැටලුත් ඔබතුමා විසදා දුන්නලු.

..ආ...වයලට් හන්ටර් මෙනෙවිය හෝම්ස් කීවේ මා දෙස බලමිනි. “අපට අර කොපර් බීචස් අභිරහසේදී නේද වොට්සන්, වයලට් හන්ටර් මෙනෙවිය හමුවුණේ. ඉතින් කියන්න, ඔබ මුහුණදී තිබෙන ගැටලුව ගැන. මේ මගෙ මිත්‍ර දොස්තර වොට්සන් ඔහු තමයි මගේ පරීක්ෂණ කටයුතු වලදී මට සහාය වෙන්නේ, පළමුව මට ඔබේ නම කියන්න” "මගේ නම ක්ලෙයා විලර් තරුණ කාන්තාව කීවාය. මේ මගේ අම්මා ඩොරිස්, අපි පදිංචි බ්‍රිස්ටල් නගරයට මඳක් ඔබ්බෙන් පිහිටි රිල්ස්බරි ගමේ, කාල්විල් පෙදෙසේ"හෝම්ස් එම කරුණු පොතක සටහන් කර ගත්තේය." "ෂර්ලොක් හෝම්ස් මහත්මයා, මගේ ප්‍රශ්නය ගැන ඔබට කියන්න පටන් ගන්න ඕනී කොතනකින් ද කියල, මට හිතා ගන්නවත් බෑ.." කතාව නැවැත්වූ ඇයගේ දෙනෙත් වලින් කඳුළු වැගිරෙන්නට විය. මිනිත්තුවක් හෝ දෙකක් නිහඬව සිටි ඇය යළිත් කතාව ඇරඹුවාය.“මගේ තාත්තා මියගියේ මං කුඩා කාලෙදි. ඒ කාලෙ සිට මෑතක් වෙනතුරුම් අම්මා, ක්‍රිස්ටල් නගරයේ රෝහලක උපස්ථායිකාවක් ලෙස සේවය කළා. ඒ නිසා මටත් රෝහලේ පිරිසිදු කරන්නියක් ලෙස රැකියාවක් ලබාගන්න පුළුවන් වුණා. ඔහු මට මුලින්ම හමුවුණේ දෙව් මැදුරෙදි. එයාගෙ නම බිලී විලර්. එයා දැන් කාලේ හැදෙන අනික් තරුණ අය වගේ නෙමෙයි. ආගමට අනුව ජීවත්වෙන, බොහොම කරුණාවන්ත පුද්ගලයෙක්, නමුත් ඒ තරම් ඉහළට ඉගෙන ගෙන නෑ. අපි දෙන්නාම ඊට කලින් අවුරුද්දෙ නත්තල් කැරොල් කණ්ඩායමට හිටියා. ඒ කාලේ කතාබස් කළාට අප අතරේ ප්‍රේම සම්බන්ධයක් තිබුණේ නැහැ. පස්සේ අපි අතරේ ඇතිවුණු හිතවත්කම, ප්‍රේම සම්බන්ධයක් වෙද්දී, ඔහු මට විවාහ යෝජනාවක් කළා. මම ඔහුට කිව්වා. අපේ ගෙදර ඇවිත් අම්මාගෙන් අහන්න කියලා. ඒ මොකද බිලීට කිසිම රැකියාවක් තිබුණේ නෑ.ඔහුගේ දෙමව්පියන් මියගිහින් තියෙන්නේ, ඔහු කුඩා කාලෙදිමයි. ඊටපස්සේ ඔහු හැදිලා වැඩිලා තියෙන්නේ, පුංචිඅම්මා කෙනෙකු ළග. මෑතකදී ඇයත් මිය ගියාලු බිලීගේ වයස විසිදෙකයි. ඔහු නොයෙක් රැකියාවලට ඉල්ලුම් පත්‍ර යවමින් හිටියේ. බිලීට උවමනාව තිබුණේ නැවත රැකියාව ලබා ගන්න.

රැකියාවක් කරලා පළපුරුද්දක් නැතිවුණත්, නැවක කම්කරුවෙකු හැටියට බැඳෙන්න පුළුවන් බව ඔහු කිව්වා. නැව්වල රැකියාවලට හොඳ  වැටුප් ගෙවන නිසා, බීලීගේ හිත ගිහින් තිබුණේ ඒ ක්ෂේත්‍රයටම  යි. අපේ අම්මා ඔහු ගැන පැහැදිලා ඇගේ කැමැත්ත දුන්නා. ඒ වුණත් ඔහුට රැකියාවක් ලැබෙන තුරු විවාහය කල් දාන්න අපි දෙන්නාම එකඟවුණා. ඔය අතරෙදි තමයි බිලීට සම්මුඛ පරීක්ෂණයකට එන්න කියලා ලියුමක් ආවේ.

“ඒ කොහෙන්ද?” හෝම්ස් ඇසීය. “ඒ ලියුම ලැබුණ අවුරුද්ද හා මාසය මට කියන්න” 

“ඒ ලියුම ලැබුණේ 'බ්‍රයිට් ස්ටා’ නැව් සමාගමෙන්. ඒ ලිවර්පූල් නගරයෙන්. ලියුම ලැබුණේ මට මතක හැටියට '84 අවුරුද්දේ ඔක්තෝබර් අන්තිමේ, නැත්නම් නොවැම්බර් මුල "

හෝම්ස් එම කරුණු සටහන් කර ගත්තේය.

"ඔහු ගියේ සම්මුඛ පරීක්ෂණයකට ඇය කීවාය. "නමුත් ඔහු ගැන පැහැදිලා ඔවුන්, බිලීව එදාම රැකියාවට බඳවාගෙන තිබුණා. එදා ඔහු අපේ ගෙදර ආවේ හරි සන්තෝෂයෙන්.

"බ්‍රයිට් ස්ටා"නැව් සමාගම සතුව, රුවල් නැව් හතරක් තියෙනවාලු. එයින් එකක කම්කරුවෙකු ලෙස තමා,බිලීව බඳවාගෙන තිබුණේ. ඔහු යාමට නියමිත නැව, දුර ගමනක පිටත්වෙලා ගිහින්, මේ කාලය වෙනකොට ආපහු ඇවිත් තිබුණේ. නැහැ. නමුත් පුළුවන් ඉක්මනින් ලිවර්පූල්හි ඔවුන්ගේ නැව් කාර්යාලයේ රැකියාවට එන්න කියා ඔවුන් නියම කළාලු."

"ඔහු බඳවාගන්නෙ මොන නැවේ සේවයටද කියල ඔවුන් කිව්වාද?" “ඔව් මහත්මයා, ඒ නැවේ නම “සොෆී ඇන්ඩසන්......"ඒ නම සඳහන් වූවාත් සමගම, හෝම්ස්ගේ මුහුණ වෙනස් වූ අයුරු මම දුටුවෙමි. කාන්තාව ද ඇගේ කථාව නවත්වා නිහඬ වූයේ, මගේ මිත්‍රයාගේ සිදුවූ වෙනස දැකීමෙන් විය යුතුය. මිනිත්තුවක් හෝ දෙකක් නිහඬව සිටි හෝම්ස් යළිත් ඇය ඇමතුවේය.

".......හොදයි ඔබේ කථාව දිගටම කියන්න" “ඔව් මහත්මයා, ‘84 නොවැම්බර් වල රැකියාව ලැබුණාම, ඒක අපට ලොකු සතුටක් වුණා. ඒ නැව '85 මැයි විතර ලිවර්පූල් වෙත  ඒවි කියලයි නැව් සමාගමේ අය කියා තිබුණේ.

ඉතින් අප දෙන්නා...........'85 ජනවාරි මාසයේ අපි විවාහ වුණා..........."

යළිත් වරක් ඇගේ දෙනෙත් වලින් කදුළු කඩා හැළෙන්නට පටන්ගත් බැව් මම දුටුවෙමි. කෙසේ වෙතත් ඇය තම කථාව ඉක්මනින් ඇරඹුවාය.

"රැකියාවට බඳවාගැනීමේදී, මෙයාලට තිබුණු එක සුදුසුකමක්, අවිවාහකවීම. ඊළහට කොන්දේසියක් තිබුණාලු, රැකියාවට බැඳිලා අවුරුදු දෙකක් යනතුරු විවාහ වෙන්න බැහැ කියලා. ඒ නිසා අපි විවාහවුණා වුණත්, ඒක රහසක් හැටියට තියාගත්තා.

ලිවර්පූල් නගරය කිට්ටුව පුංචි කුලී ගෙයක් හොයාගන්න, බිලීට හැකිවුණා. ඉතින් අපි දෙන්නා ඒ ගෙදර පදිංචියට ගියා. ‘85 මැයි මාසෙ වෙනකොට ඒ නැව එංගලන්තයට ළඟාවේවි කියා තිබුණත්, ඒ කාලෙ වෙද්දිත් නැව ආවේ නැහැ. අපට ඒකෙන් ප්‍රශ්නයක් වුණේ නැහැ. අපි බොහොම සන්තෝෂයෙන් කාලය ගත කළා. අපේ අම්මත් ඇයට විවේක වේලාවලදී ඇවිත් අපිව බලල ගියා.

බිලී සමග “බ්‍රයිට් ස්ටා” නැව් සමාගමේ සේවයට බැඳුණු තවත් කෙනෙකුත්, අපි පදිංචි ගෙවල් කිට්ටුව හිටියා. වැඩිහිටි කෙනෙක් වුණු ඔහු හිටියේ, ගෙයක කාමරයක් කුලියට අරගෙන. එයාගෙ නම ටොම් කෝබට්, ඔහු වයස හතළිස් පහක පමණ කෙනෙක්, ඔහුගේ බිරිඳ සහ එකම පුතා, කලකට පෙර මියගිය බව අපට අහන්න ලැබුණා . ඔහු වැඩි කතාබහක් නැති, නිශ්ශබ්ද කෙනෙක්. තමන් විවාහක බව සමාගමට නොකියන්න, කෝබට්ව පොරොන්දු කරවාගන්න බිලීට හැකිවුණා. වයසේ ලොකු පරතරයක් තිබුණත්, බිලීගේ හොඳම යාළුවා වුණේ ටොමි කොබට්, ඔහුත් බිලීට කතා කළේ “පුතා” කියල ආදරයෙන්, ඔහු කලකට පෙර නැව් කිහිපයකම රැකියාව කරලා ලෝකය වටේ ගිය කෙනෙක්.“සොෆී ඇන්ඩසන් නෞකාව ලිවර්පූල් වෙත ළඟාවුණේ '85 සැප්තැම්බර් මාසයේ  මුලදී ගෙන ආ බඩු තොගය බෑව ඉක්මනින්, නැව් ආපසු පිටත්වී යන්න සූදානම් වුණා." "මොනවද ඔවුන් ගෙන ආව බඩු?” 

“ ඔවුන් චිලී රටේ වැල්පරයිසෝ සහ ලිවර්පූල් අතරයි යාත්‍රා කළේ. ඔවුන් ප්‍රවාහණය කළේ වෙඩිලුණු බව මට අහන්න ලැබුණා.

ඔන්න අදත් එපියක් ගේනාවා ඔයාලට.😉තවත් එපියකින් හෙට හමුවෙමු....🤗