ශර්ලොක් හෝම්ස් : අතුරුදහන් වූ නෞකාව - සොෆී ඇන්ඩසන් (හතරවන කොටස)

 අතුරුදන් වූ නෞකාව 

"සොෆී ඇන්ඩසන්"

 

°_හතරවන කොටස_°

ඇය ඉතා උනන්දුවෙන් එම කටයුත්තේ යෙදුණාය. පාසලේදී චිත්‍රයක් අඳින කුඩා දරුවෙකු මෙන්, මකන කැබැල්ලෙන් වරින් වර මකමින්, එය ඇන්ද අයුරු අපි බලා සිටියෙමු. "c" අකුරේ හැඩයට තිබූ එම සලකුණේ විවෘත කොටස, ඔහුගේ මුඛයට ළංව පිහිටා තිබිණි.

"මෙ ලකුණු වලට අමතරව, ඔහුගේ මොනවා හරි කැළැල් ඔබ දුටුවාද ?" හෝම්ස් විමසුවේය.

"එහෙම දුටු බවක් මට මතක නෑ “ 

"ඔහුගේ කටහඩේ අමුත්තක්........නැත්නම් ඉංග්‍රීසි උච්චාරණයේ අමුත්තක්......?"

 "කියන්න තරම් අමුත්තක් මා දුටුවේ නැහැ මහත්මයා" ඇය කීවාය. "ඊට එක හේතුවක් ඔහු හරි නිශ්ශබ්ද කෙනෙක්. මට අහන්න ලැබී තිබෙන්නේ, ඔහු මගේ සැමියාට කියූ වදන් හත අටක් පමණ යි."

හෝම්ස් මේ කරුණු සියල්ල, තම පොතේ සටහන් කර ගත්තේය.

ඔහු නාවිකයෙක් නිසා, නිසැකවම දුම්පානය කරන්න ඇති." හෝම්ස් කීය. “ඒ ගැන මොනවාද ඔබට මතක?" 

"ටොම් අධික ලෙස දුම්පානය කළ බව නම්, මට හොඳට මතකයි. ඇය කීවාය. "ඔහු බිව්වේ සුරුට්ටු" 

හෝම්ස් ලාච්චුව තුළින් ගත්තේ,තරමක් දුර්වර්ණ පොතකි. එහි පිටු කිහිපයක් පුරා විවිධ හැඩ හා ප්‍රමාණන වල සුරුට්ටු ,සිගරට් රාශියක  වර්ණ සිතුවම් තිබිණි. මේ හෝම්ස් ,දුම්කොළ ,දුම්වැටි හා සුරුට්ටු අළු පිළිබඳව ලියූ පොත බව මම හදුනාගනිමි.

  "විලර් මහත්මිය මට කියන්න " හෝම්ස්  කීය. " ඔබ ඔය කියන සුරුට්ටු වල පෙනුම, වඩාත් ළංවන්නේ, මෙයින් කුමන වර්ගයටද කියා"

එම වර්ණ සිතුවම් සහිත පිටු කිහිපවාරයක් එහා මෙහා පෙරළු ඇය,අන්තීමේදි මෙසේ කීවාය."ඒ ගැන නම් මට හරියටම කියන්න අමාරුයි මහත්මයා,ඒ සුරුට්ටුවල පාට නම් ලා දුඹුරු පාටයි.හැඩයෙන් නම්,මෙන්න මේ පින්තූර දෙකේම තියෙන ඒවා වගෙයි මතක" 

"කමක් නෑ" හෝම්ස් කීය. “ඔබ කියන ඒවා රොටර්ඩෑම්හි ඔතන "හේග්" හා හාලම් හි "ටියුලිප්” කියන වර්ග දෙක - මොනවා වුණත් ඕලන්ද සුරුට්ටු.

ඒ කරුණ මට හුඟක් ප්‍රයෝජනවත් වෙන්න ඉඩ තියෙනවා. දැනට ඒ තොරතුරු ප්‍රමාණවත් සමහරවිට තවත් දවසක් කීපයක් ගතවෙද්දී, ඔබට ඔහු ගැන තවත් තොරතුරක්  මතක් වේවී.එහෙම වුණොත් මට දැනුම් දෙන්න. ඒ අතරේ මම ඔහු සොයායෑමේ කටයුතු අරඹනවා"

 හෝම්ස් මහත්මයා මට මේ කරුණ කියන්න" ඇය ඉල්ලා සිටියාය. "බිලි නැවෙන් යන්න මගෙන් සමුගනිද්දි, මං හිටියේ දරුවා ලැබෙන්න ළංවෙලා, ඒ වෙලාවේ ඒ ගමන පිටත් වෙලා යන්න, බිලිගේ මොනම කැමැත්තක්වත් තිබුණේ නෑ. නැව් සමාගමේ රැකියාව දමල ගහලා, වෙනත් රැකියාවක් හොයාගන්න හිතයි කියමින්, හිතේ දෙගිඩියාවෙන් සිටියේ. නමුත් රැකියාවල් හොයලා හොයලා හෙම්බත්වෙලා හිටී ඔහුට, මේ රැකියාව ලේසියෙන් අත්හැර දමන්න හිතුණෙත් නෑ. ගතවුණු මාස කිහිපයට ඔහුට නැව් සමාගමෙන් හොඳ වැටුපක් ලැබී තිබුණා. ඒ මාස කීපයේ සෑහෙන මුදලක් ඉතිරි කරගන්නත් අපට හැකිවුණා.

මං දන්නවා; බිලී මේ ලෝකයේ කොහේ හරි ජීවතුන් අතර ඉන්නවා නම්, ඔහු කොහොම හරි මාත් දරුවාත් හොයාගෙන එනවා. ඒක මට සහතිකයි. ඔහු දෙවියන් වහන්සේ ළඟට යන්න ඇති කියලා, මං හිත හදාගෙනයි සිටියේ. ඔහු විතරක් නෙමෙයි. නැවේ ගමන්කළ හැම දෙනෙකුටම ඒ ඉරණම අත්වුණා කියල නේ අපි හිතුවේ. එහෙම හිත හදාගෙන දැන් සෑහෙන කලක් වෙනවා. මේ අතරෙදියි මට ටොම් කෝබට්ව දකින්න ලැබුණේ. මං ඒ නම් කියා කථා කළාම, මිනිහා පුදුමයෙන් වගේ බලලා යන්න ගියා නම් ප්‍රශ්නයක් නෑ. " ඔබට වැරැදීමක්; මං කෝබට් නෙමෙයි" කීවා නම් ප්‍රශ්නයක් නෑ. නමුත් ඒ නම් කියනවා ඇහුණු ගමන්, තිගැස්සිලා, කලබල වෙලා පැන දුවපු එකෙන් තේරෙන්නේ මොකක්ද? මෙතැන මොකක් හරි අපට තේරුම් ගන්න බැරි අවුලක් තියෙනවා කියන එක නේද?"

"ඔබ කියන හැම දෙයක්ම නිවැරදියි විලර් මහත්මිය." හෝම්ස් කීය. "ඔබ කථාව කියාගෙන යද්දී, මගේ හිතටත් නැගූණේ ඔය සිතිවිලිම යි. අවසාන වශයෙන් මට මෙන්න මේ කරුණත් කියන්න. නෞකාව විනාශ වුණා කියල පුවත්පත් වල පළවුණාම, ඔබ නැව් සමාගමට යන්න ඇති. ඔබ විලර්ගේ බිරිඳ බව කිව්වාම. ඔවුන්ගෙන් ලැබුණු ප්‍රතිචාරය මොකක්ද?

" ඔවුන් පොත් පෙරළා බැලුවා" ඇය පිළිතුරු දුන්නාය. බිලී විලර් අවිවාහක කෙනෙක් කියල අපේ පොත්වල සඳහන් වෙනවා කිව්වා. එපමණක් නොවෙයි. අවුරුදු දෙකක් යන තුරු විවාහ නොවෙන්න කොන්දේසියකට, ඔහු අත්සන් කරල තිබෙන බව කිව්වා. අපි ඇත්තෙන්ම විවාහ වුණු බව ඔප්පු කරන්න, මං විවාහ සහතික පත්‍රය ඔවුනට පෙන්නුවා. එතකොට මගේ තත්ත්වය ගැන සානුකම්පිතව සලකා බලලා, නැවට රක්ෂණ වන්දි ලැබුණු කාලෙක, මට සානුකම්පිත දීමනාවක් ගෙවන්න. සලකා බලන්නම් කියලා.මගේ ලිපිනය ලබාගත්තා." 

"එහෙම ගෙවීමක් ඔවුන්ගෙන් ඔබට ලැබුණාද?" 

" නැහැ මහත්මයා” 

“හොදයි. මං මේ පරීක්ෂණය භාරගන්නවා. '' හෝම්ස් කීය. 

" ඔබේ සැමියා ඇතුළු නාවිකයන්ටත්, නෞකාවටත් අත්වූ ඉරණම මොකක්ද කියා, මං හොයා බලන්නම්. යමක් හොයාගන්ත හැකි වුණොත් මං ඔබට දැනුම් දෙන්නම්. ඒ නිසා ඔබේ නිවැරදි ලිපිනයක්  මට දෙන්න."

 ඔවුන්ගේ ලිපිනය හෝම්ස් සටහන් කරගත් පසු, කාන්තාවෝ අපෙන් සමුගත්හ. මගේ මිත්‍රයා ගැඹුරු කල්පනාවකට වැටුණේ, කටේ ගසාගත් පයිප්පය දල්වා ගැනීමට ද අමතකව ය. ඔහුගේ සිතිවිලි දාමයට බාධා නොකොට, මම සවස පුවත්පතක් කියවීමට පටන් ගත්තෙමි.

" ක්ලෙයා විලර් මහත්මීය කියු කතාව ගැන ඔබට මොනවද වොට්සන් හිතෙන්නේ ? " මගේ මිත්‍රයා විමසුවේ සෑහෙන වෙලාවකට පසුවය.

"මට හිතෙනවා ඇයට දකින්නට ලැබුණු පුද්ගලයා, ඇත්තටම ටොම් කෝබට් කියලා" මම කීවෙමි.

" ඔබේ ඒ අදහසට මමත් එකඟයි වොට්සන්.” ඔහු කීය. “ඔහුගේ නම් කියුවාම කලබල වුණු හැටියෙනුත්, මුහුණේ තිබෙන සුවිශේෂ හැඩයේ කැළලෙනුත්, ඒ බව ඔප්පු වෙනවා. අපි හිතමු ඔහු ගමන් කළ නොකාව යම් අනතුරකට මුහුණ දුන්නා කියලා.බිලී වීලර් තරුණයා එකෙදී මරණයට පත්වෙලා, කෝබට් පණ බේරාගෙන. එංගලන්තයට ආවා කියල හිතමු. එහෙනම් ඔහු කළ යුත්තේ මොකක්ද? වහාම විලර් මහත්මිය හමුවීමට ගිහිං, විලර්ට අත්වුණු ඉරණම හා අනතුර ගැන දැනුම් දීම, විලර් මහත්මිය ගැන අමතක කළත්,තමන් සේවය කළ   නැව් සමාගමට ඒ බව දැනුම් දිය යුතු වෙනවා.

නමුත්........නමුත් "සොෆී ඇන්ඩසන්" නෞකාවේ ගිහිං පණබේරාගත් කෙනෙක් ගැන. පුවත්පත් වල අද වෙනතුරුත් කිසිම ආරංචියක් පළවුණේ නෑ. ගැටලුව තියෙන්නේ අන්න  එතැනයි.

අනතුර ගැන දැනුම්දීම වෙනුවට, ඔහු තමන්ව හඳුනා ගැනීමට නොහැකි වෙන විදියට, මුහුණ පවා ආවරණය වෙන  හිස්වැස්මක් පළඳිනවා. පදිංචියත් වෙනස් කරලා වෙන්න පුළුවනි. ඔහුව බ්‍රිස්ටල්හි දකින්න ලැබුණු පමණින්, පදිංචිය වෙනස් කරලද කියල සහතික වෙන්න බැහැ. නමුත් ලිවර්පුල්හි ඔහුගේ පරණ ලිපිනයේ, කෝබට් නොහිටියොත් මං පුදුම වෙන්නේ නෑ.

විලර් මහත්මියව මුහුණ දෙන්න බැරි විදියේ වැරැද්දක්.ඔහු අතින් බිලි වීලර්ට සිදුවුණාද? එහෙමත් නැත්නම් අනතුරට ලක්වීම නිසා, සිහිවිකල්වීමක් හෝ මතකය ගිලිහී යාමක් සිදුවුණාද? මුහුදුබත් වී විනාශ වුණා. කියල අත්හැර දැමූ නැව් වලින්, දිවි ගළවා ගත් නාවිකයන් ගැන, අපට ඉඳහිට වුණත් අහන්න ලැබෙනවා. නමුත් තමන්ගේ රටට ආව ගමන් ඔවුන් මොකක්ද කරන්නේ? තමන්ගේ අත්දැකීම, දිවි ගළවාගත් හැටි ගැන. පුවත්පත් සාකච්ඡා පවත්වනවා; පොත් ලියනවා. එතකොට අර අභිරහස විසඳෙනවා. නමුත් මේ මිනිහා මොකද කරන්නේ? මුළු සමාජයෙන්ම හැංගෙන්න උත්සාහ කරනවා.

"සොෆී ඇන්ඩසන්"නොකාව හදිසියේම මුහුදේදී අතුරුදහන්වීම ගැන ඇතිවුණු කලබැගෑනිය, ඔබට මතක ඇති වොට්සන්. ඔය ගැන පුවත්පත්වල පළවුණු විස්තර කපලා, මං මගේ “ස්ක්රැප් පොතේ අලවා ගත්තා. බලමු ඒකෙ තියෙන්නේ මොනවද කියලා.

පුවත් පත්වල පළවන වැදගත් ප්‍රවෘත්ති කපා, ලොකු පොතක අලවා එකතු කිරීම, මගේ මිත්‍රයාගේ විනෝදාංශයක් විය. ඒවා අසුරා තිබූ රාක්කය පිරික්සු ඔහු '86 වසරේ අප්‍රේල්, මැයි, ජුනි, මාස සඳහා වූ පොත අතට ගත්තේය. ඔහු එම පිටු පෙරලද්දී පුවත්පත් කිහිපයකින්ම කපාගත් ප්‍රවෘත්ති තිබුණත්, සවිස්තරම වාර්තාව පළවී තිබුණේ, “ ද වර්ල්ඩ්” නම් සතිඅන්ත පුවත්පතකය. එහි සංක්ෂිප්ත සටහනක් ඔබ වෙත ඉදිරිපත් කරමි.

ඔන්න අද ගෙනාවා ඔයාලට කතාවේ හතරවන කොටස...🤩